السلام عليكم ورحمة الله ًًًًًًًًًًًًًً وبركاته

طبعا الموضوع باين من عنوانه ومش محتاج كلام كتير
الدنيا مقلوبه علي الفيس بوك وانتخابات الرئاسه هي حديث الساعه في الشارع المصرى حبيت اعرف اراء اعضاء المنتدي فى المرشحين وكل واحد هاينتخب مين بس طبعا هايكون في قواعد ولازم كلنا نلتزم بيها اول قاعده لو كنت فلول وناوى ترشح عمرو موسي او سيادة الشفيق توقع عدد كبير من الديس لايكات وومكن كمان تحذير عن مشاركه سيئه ولو المشرف اللى هيوصله التحذير ثورى يبقي الله يعينك بقيت في عداد المتبلكين (( ربنا يستر ما يكونش دكتور اسامه ناوى يرشح حد منهم واخد انا احلى بلوك :) ههههههههههه )) بجد يا جماعه القاعده الوحيده اللى عايزين نلتزم بيها هيا اننا نحترم بعض ونناقش بعض نقاش حضارى هادف من اجل بلدنا ومن اجل ثورتنا وشهدائنا ... انا هاعمل استفتاء في الموضوع كل واحد يصوت في الاستفتاء ويعمل رد فيه اسباب اختياره لمرشحه وكل واحد يتذكر وهو بيكتب الرد ده انه سفير مرشحه هنا فى المنتدى يعني بادبك واحترامك ومدى اقتناعك اللي هايكون واضح ومنعكس في ردك ممكن تكون السبب في تغيير راى احد الاعضاء وتكسب صوت اضافي لمرشحك ولو حد من الفلول غيرت رائيه يبقي يا سعدك يا هناك ليك الجنه :) ... بسم الله نبدء ... انا اول واحد هاقول انا هارشح مين ... ان شاء الله حمدين صباحي

اسباب اختيارى : اولا انا طول عمرى كنت اسمع عن حمدين صباحي من ابويا علي انه مناضل ثورى من قبل ما نعرف يعني ايه ثوره ولكن للامانه وبما انى انتمي لجيل تافه وفخور بده لانى واثق ان الجيل التافه ده مسيره يفوق ويصنع نهضة بلاده بما انى من الجيل التافه ده عمرى ما اهتميت اتابعه او اعرف حاجه عنه او اتفاعل مع نشاطاته لكن من بعد الثوره ومن اول ما اعلن انه سيخوض انتخابات الرئاسه قررت ان اضعه في اول قائمة اختياراتي وكنت محتار بينه وبين ابو الفتوح الى ان شاهدت له ثلاث حلقات متتاليه اول حلقه يوم الاحد الماضي مع مني الشاذلي في برنامج العاشره مساءا ويوم الاتنين والثلاثاء في برنامج مصر تنتخب الرئيس كانوا كفيلين بضمان صوتي لهذا الرجل

ثانيا وجدته رجل المرحله بكل ما تحتويه الكلمه من معني مدرك تماما اسباب انتكاستنا وتخلفنا فوجدت في برنامجه نظره ثاقبه للمستقبل وجدته يهتم بثلاث فئات من فئات المجتمع الفقير والفلاح والشباب تحليلي انا عن اسباب اختياره للثلاث فئات دول بالذات وهذا ما جعلني اثق ان هذا هو رجل المرحله ... الفقير اذا ضمنت له المسكن والماكل والمشرب والتامين الصحي ووفرت له سبل الحياه الادميه قضيت علي الانفلات الامني في المجتمع ... الفلاح على مدار الاربعين سنه الماضيه كان مجرد صفر علي الشمال في حسابات الدوله بالرغم من اننا دوله زراعيه في الاساس من ايام الفراعنه لكن منذ ان قررت مصر علي يد الرئيس السادات ان تتحول الى دوله صناعيه وتنفتح علي العالم نسينا الزراعه واهملنا الفلاح لم نثقفه ولم نطور ادائه ولم نمده بالميكنه الحديثه فكانت النتيجه انكماش صادرتنا الزراعيه وكمان لم نحقق اى نجاح يذكر في مجال الصناعه بالرغم من ان ارضنا وطينا من اخصب اراضى العالم وعندنا مساحه مهوله ملاييييييين الافدنه صالحه للزراعه انا سمعت من عمي انهارده معلومه وهى ان المنطقه الواقعه بين الاسكندريه ومرسي مطروح علي الساحل الشمالى كانت تسمي (( سلة غذاء العالم )) كانت تكفي وتغطي كل احتياجات الامبراطوريه الرومانيه بالكاااااااامل من القمح ... اما الشباب فهم طاقة اى مجتمع يسعي الى النهضه اذا وفرت لهم سبل العيشه الكريمه من فرص عمل بمرتبات ادميه تكفيه وتكفي اسرته وضمنت له السكن ويسرت له الزواج ستاخذ منه انتاج ثلاث اضعاف قوته وطاقته .. الشباب المصرى معروف بقوته وجبروته (( على رائ محمد هنيدي :) ))

باختصار هذا هو ما وجدته مميزا في حمدين صباحي يحاول حل مشاكل الفقير بحثا عن الامن ... ويحل مشاكل الفلاح بحثا عن اقتصاد زراعي ينعش خزينه الدوله بمليارات الدولارات ويعيد لمصر تميزها الزراعي ... يحل مشاكل الشباب لانهم وقود المجتمع في كل المجالات بحثا عن دوله قويه بشبابها وانتاجهم ... لم اجد من مرشحي الرئاسه من يراهن علي الطاقه البشريه الكامنه داخل شعبه ويراهن علي روح الانسان الذي ما ان وجد قائد عادل سيبدع لا محااااااااااااااله وسننهض وننطلق الى مصاف الدول الكبرى بقدر ما وجدتها في برنامج حمدين صباحي

ثالثا لا ينتمي الى اى ايدلوجيه محدده فهو لا اخواني سابق ولا حالي ولا هو كائن فلولي متحول وماحدش يضحك عليك ويقولك ده ناصري عشان مافيش حاجه اصلا اسمها ناصرى الناصريين دول كانوا عملوا حزب اسمه العربي الناصري وهو حزب اشتراكي اعتقد انه اندثر بفعل عوامل التعريه والزمن والناصريه هيا مجرد اعتبار جمال عبد الناصر مثل اعلي مش اكتر وهو قال واكد في معظم حواراته لما بيحاولوا يعايروه عشان ناصري قال انه معجب بجمال عبد الناصر الثورى اول من حاول احياء روح القوميه العربيه فينا المنحاز لقضايا الفقراء فقط لا غير وتقدروا ترجعوا لحواراته تسمعوا بنفسكم

ملخص ما سبق انا وجدت في حمدين صباحي روح القياده والكفاح والحماس والبساطه اعتقد اكثر شبيه لحمدين صباحي نقدر نشبهه بيه هو لولا دا سيلفا البرازيل المناضل من اجل حقوق العمال كانت البرازيل تعاني من عجز موازنه رهيب علي مدار 8 سنوات انتخبه شعبه لفترتين رئاسيتين متتاليتين اهتم فيهم وراهن علي الطاقات البشريه فحل عجز الموازنه واستبدله بفائض كبير وتحسن المستوي المعيشي للمواطن بشكل كبير ده غير ان فريق البرازيل في عهده كان رهيب رهيب رهيب :) ... انتخبوا حمدين صباحي

منتظر تفاعلكم واتمني ما يكونش الموضوع مكرر ويتحذف انا بقالي ساعه بكتب فيه ممكن يجيلي شلل

ملحوظه : نرجو من اخونا العرب ايضا المشاركه والتفاعل معنا والتصويت لمن يتمنون ان يصبح رئيسا لجمهورية مصر العربيه وتوضيح الاسباب
ولا تنسوا جميعا انتم سفراء مرشحيكم احرصوا ان تكونوا سفرا مشرفييييين