المساعد الشخصي الرقمي

مشاهدة النسخة كاملة : شرح استراتيجية دكتور جمال ممدوح بتوقع حركة السعر القادمة (ملخص)

alskndry
24-02-2012, 10:18 AM
بسم الله الرحمن الرحيم

اولا اعزائى واخوانى هذه الاستراتيجية لاحد الاخوة الافاضل دكتور جمال ممدوح

كما ان الشرح بعضه منقول للامانة مع بعض الاضافة من جانبى وهذا للامانة

ولكنى حبيت ان اقوم بنقلها للفائدة ولانها بجد من افضل ما رايت

مميزاتها

1- تقوم بتحديد حركة السعر لليوم القادم والاسبوع القادم والشهر القادم

نعم نعرف حركة السعر والترند هيكون هابط ا م صاعد وان بدأ يعكس ندخل معاه برضو وكسبانين

2- لا نعتمد على مؤشرات تعيد رسم نفسها اللى الكل زهق منها


مقدمة

هى طريقة تعتمد على المقاومات والدعوم والترندات

ولكن اختلف الجميع فى كيفية تحديد هذه الدعوم والمقاومات

فمنهم اللى قال اللى بالعرض افضل (بالعرض يعنى خط أفقى)، ومنهم قال اللى بالجنب (اللى هو خط الترند) وتفنّنوا فيه، وطلع فيه مقولات كتير (خليك مع الترند، اجعل الترند صديقك،Trend is my friend، مش عارف لو عاكست الترند هايحصلك ايه) ولكن...


ازاى نرسم الترند؟؟

فمنهم اللى بيرسمه على قاعين أو قمتين كفاية، ومنهم اللى بيقول لا لازم 3 قيعان أو 3 قمم حتى نعترف بإن ده ترند

ومنهم اللى بيقول لازم نرسم خط الترند على الهاى او اللو للشموع، وأى اختراق للترند ولو بنقطة لابد من تعديل رسم الترند على الشكل الجديد

ومنهم اللى بيرسم على الكلوز ولا يعترف بالهاى واللو تماما حتى لو اخترق الترند فيكون الترند سليما

والمشكلة الكبرى فين بقى؟؟

لما الصفقة تكسب يبقى ده العادى والترند تمام، ولما تخسر (طبعا بيبان بعدها) يقولك انت مش راسم الترند على القمم والقيعان مظبوط، ودى كده الرسمة الصح، طيب مانا ساعتها ماكنتش عارف انه هايعمل قاع مثلا اقل وعشان كده المقولة المشهورة (ما أسهل ان تكون محللاً بعد الحدث)

فكيفية رسم الترند بالطريقة السليمة ليس متاحاً للجميع، وعشان كده الناس اتجهت للمؤشرات اللى بترسم الترند لوحدها

وطلع من هنا كمية استراتيجيات كتير زى الشغل على الارتداد أو الشغل على الاختراق فقط ولما كثر موضوع الاختراق الوهمى (كما يسمونه) عمل مؤشرات مساعده للترند لفضح الاختراق الوهمى مثل توليفة موفينج او استوك او آر اس آى وغيره من المساعدات

وفيه اللى ساب ده كله واشتغل دعوم ومقاومات على شكل دوائر أو بيضاوى

كل ده كويس على فكرة

ومش غلط

بالمناسبة، مافيش حاجة اسمها غلط فى الفوركس، كله كويس، وبيمشى، ولكن المهم هو هايمشى امتى (فى التذبذب ولا الترند)؟؟ ولفترة اد ايه (كل وقت وله نظامه)؟؟

نرجع تانى للأساسيات

الدعوم والمقاومات اللى انبثق منها الترند

فيه ناس بتحب تتعامل معاها كخطوط افقية فقط ولا تتعامل مع الترند المائل (ومنهم أساتذة أجانب)، فيرسم خط من نقطة الدعم بالعرض وخط من نقطة المقاومة ويتعامل مع السعر من حيث الارتداد أو الاختراق زيه زى الترند العادى

ولو تبص لأصل المواضيع كلها هاتلاقى ان الدعوم والمقاومات أو بمعنى آخر القيعان والقمم هم أصل كل شىء

يعنى

جان اللى مدوخ الناس بحركاته السحرية واللولبية كل اللى بيحاول يعمله انه يتنبأ بالقمة القادمة أو القاع القادم من خلال السابق

اليوت ونظرياته واسلوب العدّ اللى اختلف فيه الكثيرون، ما هو الا نفس الشىء، فالموجة اللى بتجرى ورا الموجة عبارة عن قمة أو قاع

وغيره من فايبوناتشى، وفايبوناتشى اكستنشن والنسب الذهبية لإيجاد القمة القادمة أو القاع المحتمل

ومنها انبثق الهارمونيك بأشكاله ليتوقع نفس الشىء


يبقى الفكرة واحدة ولكن كل واحد بيختار حسب شخصيته


يتبع فى المشاركة القادمة
alskndry
24-02-2012, 10:23 AM
تعريف بحركة السعر


الحركة التى يسميها بعض الناس بال (عشوائية) انما هى فى منتهى الانتظام والتكامل المتناهى لمن يستطيع الإلمام بها


فأنا أشبهها مثل التروس المتشابكة والمختلفة الأقطار (أنا حاسس ان انا متكتّف فى اللغة الفصحى دى بس نحاول نكمّل



فعندما ندير الترس الكبير لفّة واحدة يدور الترس الأصغر منه مثلا 4 لفّات حتى تكتمل الدورة الواحدة للترس الكبير


وبالتالى يدور الترس الثالث وهو الأصغر من الثانى والمتصل به حوالى 40 دورة كاملة خلال هذه الدورة الواحدة للترس الأكبر


ويارب اكون استطعت اوضح فكرتى



فعندما نقول مثلا أن زوج كذا سيصعد 500 نقطة على الشارت اليومى (الترس الكبير مثلا)


فمن الممكن أن يهبط أولاً السعر 50 نقطةعلى فريم ال 4 ساعات قبل ان يرتد صعودا 200 نقطة وثم يهبط 50 آخرين ثم يصعد وهكذا حتى يصل لل 500 نقطة وهى هدف الشارت اليومى


وخلال هذه الحركة على مستوى 4 ساعات والتى نلاحظ انها بدأت بالهبوط أولاً، نجد على شارت الساعة انه كان هناك هبوطاً سابقاً وكل الاشارات تدل على استكمال الهبوط (وكمان بالتأكيد مع الفريم الأكبر منه وهو ال 4 ساعات يدل على هبوط بسيط)


وبذلك نأتى للمحصلة



من يدخل على فريم الساعة متسدلاً على الاتجاه بفريم ال 4 ساعات يقول ان حاليا هبوط (وهو صحيح) واذا دخل بيع يكسب 50 نقطة (اللى قلنا عليهم سابقا)


والذى يدخل شراء على فريم ال 4 ساعات مستدلاً باليومى للإتجاه فهو محق، وسيكسب 200 نقطة ولكن بعد ارتداد 50 نقطة أولاً


وهكذا



فخلال ما يكون الترس الأكبر اتجاهه لأعلى يكون الاصغر منه اوقاتاً لأعلى وأوقاتاً لأسفل، والاصغر منه اعلى وأسفل بصورة أسرع وهكذا حتى تكتمل الدورة


ومن هنا يأتى التذبذب


وكل ما سبق هو اساس فكرة اليوت والموجات، وغيره من الناس اللى مجرد فسروا السوق فى كلام منمّق وليس اختراع، انما هى مجموعة ملاحظات من تصرّف السعر وصاغوها فى اسلوبهم فقط



ولذلك ينصح كل الخبراء بالسوق الابتعاد عن الفريمات الصغيرة لشدّة التذبذب ولعدم وضوح الاتجاه، وطبعا سمعنا ان كلما زدنا فى الفريم كلما تكون العملة اكثر طوعاً واحتراماً وأقل تأثراً بالمتغيرات كالأخبار وغيره


ولكن...


الفريم الكبير يكون هدفه كبير صحيح ولكن استوب كبير ايضا بالنسبة للأصغر منه


ففى المثل السابق


من يدخل على فريم الساعة يكون هدفه 50 نقطة واستوب 20 نقطة فقط


أما من يدخل على ال 4 ساعات فاذا وضع نفس الاستوب يكون وصل له مع الارتداد 50 نقطة، فلابد ان يرتفع الاستوب وليكن 100 نقطة وبذلك لابد ان يرتفع الهدف فيصبح 250 نقطة


وكذلك اليومى لمن سيحاول أخذ ال 500 نقطة كلهم، فلن يضع استوب 20 ولا 50 فيسجد نفسه يستخدم استوب كبير للوصول للهدف الكبير



طيب اى الفريمات افضل؟؟


انت الذى يحدد ذلك


حسب عدة أشياء منها


- تفرّغك للفوركس: من الممكن ان تكون متابع جيد ووظيفتك هى الفوركس فبذلك ليس لديك مشكلة فى هذه النقطة، ولكن من الممكن ان تكون لديك وظيفة أخرى وليس لديك متسع من الوقت الا ساعة يوميا مثلا فبالتالى لن يستقيم معك فريم الساعة ولا ال 4 ساعات، وهكذا


- العامل الثانى هو رأس المال: فليس من الممكن ان يتم العمل على فريم يومى براس مال 200$ مثلا، المقصود كلما كبُر راس المال زادت الصلاحية للفريمات الكبيرة (ولكن ليس بالضرورة العمل عليها) انما اصبح متاحاً العمل على الفريم الكبير



نعود ثانيةً الى السؤال ما هو الفوركس؟؟


السوق شىء من اثنين لا ثالث لهما


اما تذبذب (عرضى) أو اتجاه واضح (ترند)


وطبعا المقصود بالاتجاه سواء صاعد ام هابط المهم انه اتجاه واضح المعالم


وكل الذى ينفع مع اوقات التذبذب يفشل مع الترند والعكس صحيح



فعلى سبيل المثال لا الحصر


مؤشرات التشبع وهى مثل آر إس آى، واستوكاستيك، وسى سى آى، وغيرهم تصلح تماما مع التذبذب حيث تُظهر متى سيرتد السعر وهل هو فى مرحلة تشبع بيع ام تشبع شراء


ولكنها مدمّرة فى اوقات الترند حيث انها تتشبع تماما (شراء مثلا) فيبيع المتاجر، ثم يكمل السعر صعودا ضارباً بالمؤشر عرض الحائط، فيبدأ المؤشر بتعديل نفسه ويهبط خلال ما السعر يرتفع لكى يستعيد المؤشر عزيمته، ثم يرتفع المؤشر مرة أخرى حتى مراحل التشبع فيبيع المتاجر مرة اخرى ظاناً ان السعر اكتفى.... ولكن هيهات، فيظل السعر فى الاتجاه حتى يأتى على كامل الحساب


ومن هذه المؤشرات أيضاً البولنجر باندز فعند الاتجاه يلمس السعر الحد العلوى عدة مرات فى كل مرة يبيع المتاجر ويرتفع السعر ليلمس الحد العلوى مرة اخرى وهكذا


ومن هنا انبثقت استراتيجيات عديدة كلها للتحايل على هذا الوضع


فمنهم من قال البيع لا يكون الا باغلاق شمعة فوق الحد العلوى للبولنجر وليس ملامسته


او الذى اتجه الى الشراء عند تشبع المؤشرات بالشراء (أى العكس)، وبالفعل يكسب بهذه الاستراتيجية ويفتح لها الورشة بل ويتجه البعض انه اكتشف السر وكيف كان يتلاعب السوق بنا


ولكن كل ما هناك انه كان فى فترة الترند فكان عند تشبع المؤشر شراء يشترى ويصعد السعر (على عكس اخونا السابق من يستخدم المؤشر مظبوط) ولكن أول ما يهدأ السوق ويعود لطبيعته فيصبح المؤشر فعّالاً يجد المتاجر نفسه يشترى من اعلى نقطة ويبيع من اقل نقطة



أما النظام الآخر


فهو الترند


ونجد المؤشرات التى تتوافق معه على سيبل المثال لا الحصر أيضاً


الموفنج افريدج، الايشيموكو، المومينتوم وهكذا


فلنأخذ الموفنج كمثال


استراتيجية تقول البيع عند اغلاق شمعة تحت موفنج كذا والشراء عند الاغلاق فوقه


جميل جدا فى فترة الترند


فعند الاغلاق فوقه (أيا كان رقم الموفنج، ولو كان رقمك المفضّل او حتى رقم تليفونك) سيستمر السعر فى الصعود، ليس بسبب الموفنج والاغلاق فوقه، ولكن بسبب انه ترند صاعد، وستكون المكاسب كبيرة (هذا اذا صبر المتاجر على الأرباح)


ولكن نجد انه فى وقت التذبذب من الممكن ان تغلق شمعة فوق الموفنج فيشترى المتاجر والشمعة التى تليها تغلق تحته فيغلق الشراء على خسارة ويبيع، وبعد شمعتين بالعرض تغلق شمعة فوق الموفنج فيحتار المتاجر


ومن هنا ظهرت عدة اساليب للتحايل على هذا السيناريو أيضا



فمنهم المضاعفات (وما أدراك ما المضاعفات) فيقول فى كل مرة يتذبذب السعر ندخل بضعف عدد اللوت السابق فى الاتجاه المعاكس وهكذا الى ان يفرجها ربنا ويمشى السعر بعيدا عن الموفنج يعوّض كل الخسائر السابقة


ومنهم من قال ان موفنج واحد لا يكفى بل هو تقاطع 2 موفنج لتأكيد الدخول (ونفس النتيجة الحتميّة للأسف)


ومنهم من عمل توليفة من 3 او 4 موفنج


والله انا رأيت بعينى استراتيجية تعتمد على 16 موفنج مختلفين لدرجة ان السعر لما يعد يُرى بالعين المجردة (بس ألوانها عجبتنى)



كلللللللللل هذا ما أسمّيه بالتحايل


الموضوع وااااااضح


هناك وقت للتذبذب ومؤشرات لهذا الوقت لاتنفع مع غيره فلا تستعملها بالعافية


وهناك وقت للترند ومؤشرات تنفع معاه فلا تستعملها مع غيره



يبقى السرّ!!


وهو كيفية معرفة الوقت الحالى ترند ولا تذبذب حتى نعمل بالطريقة المثلى له


واذا عرفت... فكم ستطول هذه المدة حتى نغير الاستراتيجية؟؟


وهذا ليس سراً، انما فكرة التروس السابقة
alskndry
24-02-2012, 10:33 AM
مرفق كل المؤشرات و التمبلت المستخدم
نبدأ التطبيق العملى

أولا
شرح مبسط للتيمبلت
شمعة السعر اللى الاغلاق فيها اقل من الافتتاح بتكون لونها احمر
واللى الاغلاق فيها اكبر من الافتتاح لونها اخضر

فيه خطوط منقطة بالطول ودى ذات اهمية قصوى
دى بتسمى (Period Separator)
يعنى فاصل لكل فترة
لو انت على فريم الساعة بيكون الفاصل ده كل يوم (بتوقيت البرنامج بتاعك)
ولو نقلت على فريم ال 4 ساعات بيكون الفاصل ده كل اسبوع
ولو انتقلت لليومى هايكون الفاصل كل شهر

نيجى بقى للمهم
عاوزين تركيز من فضلكم
فيه اداة فى البرنامج اسمها
Linear Regression Channel
ودى المسئولة عن رسم قناة على عدد شموع معينة
طيب ولو الأداة دى مش موجودة عند فى التوول بار؟
نعمل الاتى
ندوس بالماوس الزرار اليمين على أداة رسم خط الترند
ونختار من القائمة اللى هاتطلع
Customize
ونختار من اللستة على الشمال الأداة اللى قلنا عليها وندوس
Insert
هانلاقيها بقدرة قادر بقت على اليمين
وندوس اوك

كده الأداة بقت موجودة عندنا على طول فى التوول بار



الأداة دى بقى بتعمل ايه؟


دى بترسم قناة اوتوماتيك على الشموع اللى انت بتحددها


يعنى ببساطة بتعمل حاجة شبه الترند على متوسط الشموع اللى انت بتختارها فى فترة معينة


طيب ايه الفايدة؟


أولا انت مش بترسم الترند بإيدك فلا مجال للخطأ، أو انى أقولك بعد شوية لأ دانت راسم على قمتين مش صح، ولا الترند مش ماشى على الذيول مظبوط


ثانيا دى بتعمل قناة يعنى مش ترند بس لا، دة كأنه ترند من فوق ومن تحت، فبتدى فرصة يا اما تتداول داخل القناة على الارتدادات، او تتداول على كسر القناة اما من فوق أو من تحت



طيب كل ده كويس


تعالى بقى نستخدمها



أولا هانخلينا على عملة واحد وفريم واحد مبدئيا لما نخلص سوا تبقى تغير اللى انت عاوزه


هانختار عملة الكيبل (الباوند دولار) وفريم الساعة


ثانيا نختار الأداة من التوول بار (ماهى بقت موجودة خلاص)


وتيجى على اليوم اللى قبل اللى انت عاوز تختبره وتعمل دراج (يعنى تدوس بالماوس وتشد من غير ماتسيب) من اول اليوم لحد آخره (من الشمال لليمين)


وطبعا انت معاك الفواصل يعنى هاتسهل لك كل حاجة



مثال



لو انت عاوز تختبر اللى حصل النهاردة مثلا (النهاردة 24 فبراير)


هاتيجى على امبارح (23 فبراير) وترسم بالأداة من أوله لحد آخره (من الفاصل للفاصل)



ماشى كده لحد الوقتى ولا فيه أسئلة؟


مافيش؟


طيب تمام



نعمل دبل كليك (ندوس مرتين) على خط المنتصف فى الخطوط اللى اترسمت بالأداة عشان يتم الاختيار


وندوس يمين بالماوس ونختار


Properties


او الخواص


ومنها نختار الاتى


من التاب الأول هانسيب الاسم زى ماهو مش فارقة


ونختار اللون


Indigo


أو أى لون يعجبك بس انا باقول عشان توحيد الشارت فى الفرص بعد كده ان شاء الله


وتعلّم صح على الاختيار


Draw as Background


وده بيخلى الخطوط المرسومة تظهر على شكل مستطيل ملون بدلا من خطوط فارغة



وبعدين تنقل على التاب التانى واسمه


Parameters


وتعلّم صح على


Ray


وده بيخلى الخطوط ممتدة مش لحد آخر اليوم وخلاص



وأخيرا تروح على التاب التالت واسمه


Visualization


وتشيل علامة الصح من على


Show on All Timeframes


وتحط صح على


H1



وبكده يظهر اللون فى فريم الساعة فقط عشان الباقى له نظام تانى



وتدوس اوك


هتطلع الصورة بالشكل ده

http://im28.gulfup.com/2012-02-24/1330068933741.png
alskndry
24-02-2012, 10:39 AM
نبتدى المرحلة التانية

طبعا مش هانكرر هنا خطوات وضع الأداة عشان خلاص هى موجودة

هانعمل نفس اللى عملناه من رسم بالأداة انما المرة دى هايكون من اليوم اللى قبل اللى قبله (يعنى فى المثل بتاعنا من اول يوم 1 مارس)

نختار الأداة ونعمل دراج (خلاص عرفناها من قبل كده) من فاصل بداية اول امبارح (22 فبراير ) لحد نهاية امبارح (23 فبراير)

يعنى نهاية الخطوط واحدة اللى هى بداية يوم التجربة اللى هو النهاردة كمثال

ولكن بداياتهم مختلفة، واحدة تحتوى شموع يوم، والتانية تحتوى شموع يومين


هانيجى بقى على التانية (الجديدة) ونعمل دبل كليك ونعمل نفس الخطوات السابقى تماما

بس كل الفكرة اننا هانغير اللون فقط ونجعله لون

MidnightBlue

اللى هو جنب اللى فات على طول


وبالتالى تكون النتيجة الصورة زى دى

http://im20.gulfup.com/2012-02-24/1330069176781.png
alskndry
24-02-2012, 11:01 AM
تعالى نشوف بقى
هى الأداة واحدة ولكن يختلف شكلها باختلاف الشموع التى تحتويها
ومن هنا تيجى اختلافات الاستخدام

يعنى لما نلاقى شكل زى مثلا (اللى هو موجود قدامكم)

من قبل ما اليوم يبتدى خالص
خلى بالك ان الأداة بتترسم على شموع امبارح وأول امبارح
وكمان مافيهاش غلط فى الرسم ده اوتوماتيك


ثانيا تحديد لليوم الجديد ومن قبل ما يبتدى يعنى مش خلال اليوم
ثالثا امتداد الرسم بيرسم ملامح اليوم الجديد

زى ما قدامنا فى الشارت تخيل ان مافيش شموع لسه النهاردة بس فيه امتداد الألوان
هانقول على بتاع امبارح اللى يحتوى يوم واحد بس (الأحمر) و اللى يحتوى يومين (الأزرق) عشان نقدر نتابع مع بعض
الأحمر والأزرق بيتخذوا عدة أشكال مع بعض (كل يوم بيومه) وكمان عدة تخانات (سواء عريض أو رفيع) وكمان عدة اتجاهات (فوق وتحت وبالعرض) وكل توليفة ولها التعامل الخاص بتاعها

هانلاقى النهاردة عبارة عن ان الأحمر متوسط السمك ومتجه لاسفل والأزرق عريض (تخين) وماشى لتحت شوية
الحالة اللى زى دى لما السعر يخرج من الأحمر يبقى هيطلع فى الغالب لحد لما يلمس حد الأزرق العلوى او بنسبة غالبة منه

فيكون الدخول شراء من بعد اغلاق شمعة كسر الحد العلوى للأحمر والتارجت نقول تقريبا 80% من المسافة بين الأحمر والحد العلوى للأزرق (ده لحد لما نعرف ازاى ان السوق اكتفى كما قلنا سابقا)
والمثال كما فى الصورة



وده كان مثل حى للى حصل امبارح


على الباوند بتاريخ 23 فبراير 2012


http://im12.gulfup.com/2012-02-24/1330070444431.jpg
alskndry
24-02-2012, 11:23 AM
نرجع و نكمل شرح




لازم تعرف الأدوات اللى فى ايدك كويس اوى وامكانياتها قبل ما تستعملها
عشان تقدر تستعملها صح، وبكامل طاقتها، وعشان تتلافى عيوبها، وتبعد عن أضرارها.. مش كده ولا ايه

الأداة اللى معانا دى عبارة عن ايه؟
عبارة عن ترند داخلى (بداخل الشموع) وبعدين معمول خط بنفس زاويته علوى وخط تانى بنفس زاويته سفلى، يبعدا عنه بمقدار أكبر بعد لذيول الشموع عن الخط الترند الأصلى

نفهم ايه من ده؟
ان الأساسى فى الموضوع هو الخط الوسطانى لأنه هو ده الترند بتاعنا
وعشان كده كما تفضل الاستاذ جان (الجديد) بالشرح، اذا فضل السعر يلمس ويتراجع ومش قادر يكسر خط المنتصف بيعكس

خلى بالك ان الموضوع عبارة عن توليفة من الحاجات مش مجرد خرج تقوم تشترى او تبيع

فيه حاجة مهمة عاوز اقولها النهاردة
ازاى نوصل بالثقة فى الصفقة قبل الدخول حتى نصل الى 100% عشان نقدر ندخلها

مافيش حاجة اسمها 100%
أمال ايه؟ مش هاندخل ولا صفقة؟؟
لا
انما فيه حاجة اسمها الثقة المتراكمة
بمعنى
لما السعر كسر الأحمر مثلا لفوق ده بيدينا ثقة انه (احتمال) يكمل طلوع، وكمان (احتمال) يصل للحد العلوى الأزرق
بس هل تكفى كمية الاحتمالات دى عشان ادخل الصفقة؟؟ طبعا لا
امال نعمل ايه؟
مثلا الاحتمالات دى خليتنا واثقين بنسبة 30% ان الاتجاه صعود
طيب ده لسه كتير اوى فاضل 70%
ندخل على الفريم الأكبر عشان نعرف احنا فين من الخريطة (ده هايتشرح بالتفصيل فى مشاركة تانية النهاردة برضة باذن الله) فلو كان الفريم الأكبر يؤكد الصعود زادت النسبة مثلا ل60%
لسه فاضل 40 (اخلص بقى امال هاندخل امتى؟)
لما نلاقى سلوك السعر (وده أهم حاجة فى الفوركس وهو ده القائم عليه اى استراتيجيات او ملاحظات، انت اساسا بتلاحظ سلوك السعر، وكل اللى بنعمله ده ناتج عن ملاحظات لسلوك السعر، فماتخليش الملاحظات تحجب رؤيتك لسلوك السعر الأصلى)
بمعنى، لما مثلا يكون الكسر بقوة فده دليل على انه مكمل بقوة باذن الله
حتى لو عمل اعادة اختبار
انما لما يكون السعر ما بيتدلع لا ادخل الا لما تكون فيه اشارة تأكيدية
يعنى مثلا رجع عمل اختبار ورد بقوة شوية
نزل شوية لحد ما خبط فى دعم سابق
عمل شكل شمعة من بتوع الصعود (هامر محترمة ولا بيرسينج ولا بولش انلجلفينج ولا حاجة من دول)
المهم يكون فيه تأكيد من سلوك السعر نفسهمثلا وصلنا كده لل 90%
فاضل حاجة بسيطة ويمكن الاستغناء عنها (احنا وصلنا ل 90 بلاش طمع) ودى هايكون شرحها قداااام شوية بعد ما نتمكن من الأداة دى عشان مانتوهش، كمان ممكن نقدر نشتغل من غيرها

المهم
عاوزين الرزانة
عاوزين يبقوا الاخوان هاديين وراسيين فى الدخول
نقطة الدخةل لما بتكون صح بتريح المتاجر
ويقدر يقسّم على السوق براحته
انما لما بتكون غلط والعياذ بالله
بيبقى مش عارف يعمل ايه
هل يعزز؟ هل يقفل على خسارة بسيطة؟ ولا يعمل هيدج ويستنى؟ وطول ماهو قاعد يلوم نفسه ايه اللى دخلنى، ويلوم اللى عامل الموضوع (اللى هو انا) وفى الآخر يلوم الفوركس انه نصب
ادخل صح حتى لو تستنى كذا يوم من غير متاجرة (انا عارف ان ده صعب للمدمنين)
فحاول تسيطر على شعورك وادخل من نقطة صح

"انا باستنى السوق لما يتحايل عليا عشان ادخل"
فعلا كده



يبقى يا اخوانى
الدخول الصح بيريح المتاجر
أدخل بسبب (ولو عرفت تكتب السبب يبقى كويس ليك)
وكمااااااااااان
أخرج بسبب
alskndry
24-02-2012, 11:33 AM
بعد كدة هنعمل ايه

هانجيب شارت ال 4 ساعات (للباوند اللى احنا مثلا شغالين عليه) وبعدين نعمل نفس اللى عملناه فى شارت الساعة بنفس الأداة ونفس الألوان بس مع تغيير حاجتين

أولا انك تختار فى خانة

Visualization

انها تظهر على ال 4 ساعات

يعنى تعمل صح على خانة

4H


وثانيا

هانرسم برضة بنفس المنطق على الفواصل

ولكن الاختلاف هو قيمة الفواصل

اللى هاتشير المرة دى الى اسبوع واسبوعين بدلا من يوم ويومين


وفى الحالة دى هانرسم الكلام ده مرة فى الاسبوع عشان نحدد ايه اللى هايحصل خلال الاسبوع ده باذن الله

وبناء عليه نقدر نحدد هانعمل ايه على مستوى الساعة


يعنى

رسمنا على ال 4 ساعات مع بداية يوم الاثنين الرسمة بتاعتنا

وبعدين لقينا السعر عند حد القناة السفلى مثلا على ال 4 ساعات

وروحنا على الساعة لقيناه بعد شوية عمل كسر للأحمر لفوق بقوة

يبقى انت عاوز ايه تانى عشان تدخل؟

على الحد السفلى لل 4 ساعات (يعنى اسبوع بحاله شرا) و كسر على الساعة الأحمر يعنى شرا برضة، والكسر كان بقوة او اعادة اختبار ارتدت بسرعة، يعنى سلوك سعرى موجب

يبقى تدخل انت كمان بقوة وانت مستريح الضمير ههههه

تاخد ربحك وتحمد ربنا



يبقى دة كده يورينا الشكل الاسبوعى ممكن يبقى عامل ازاى

والتفاصيل الدقيقة مع شارت الساعة


مثل عملى (بس اعملوا شارت ال 4 ساعات الأول عشان تتابعوا معايا)

ده شكل على ال 4 ساعات عشان يوضح شكل الاسبوع اللى جاى هايحصل ايه

هانلاقى انه اول الاسبوع مابتدى نزل شوية صغيرة لحد لما لمس الحد السفلى للأزرق

تمام؟

وبعدين راح طالع بقوة وعمل شمعة بولش انجلف (مش مهم تكون عارف فى الشموع اوى) المهم انه ارتد لما لمس الحد السفلى للأزرق


http://im23.gulfup.com/2012-02-24/1330072197901.png


كل ده احنا مالناش دعوة

كل ده فى انتظار الصفقة الصح

بلاش ايدك تاكلك


نقوم داخلين على شارت الساعة بقى بتاعنا

هانلاقيه شكله زى اللى فى الصورة


http://im12.gulfup.com/2012-02-24/1330072245921.png


حصل ايه؟؟

كان الاحمر والأزرق فوق بعض تقريبا، وعرضهم متوسط نوعا ما، وده من أقوى الأشكال اذا اتكسر

وراح السعر كاسر الاتنين بقوة

ورجع عمل اختبار وشوف راح فين


مع ان اليوم ده تلاقى ناس كتير بتعيط وعمالة تكتب انها خسرت جزء كبير من حسابها او الحساب كله

وانت تحمد ربنا زى ماقلنا على نعمته ان كسبت مكاسب محترمة جدا فى اليوم اللى الناس بتشتكى انه صعب جدا جدا


وبعدين

الناس كلها لما شافت الطلعة القوية جدا اللى حصلت (اللى احنا عارفينها من قبل ما يبدأ الاسبوع من فريم ال 4 ساعات ولله الحمد واخدناها من اولها لآخرها) بعد ما شافوا اللى حصل قالك ده ترند صاعد و و وهانستناه عند كذا وما حدش يبيع الكيبل واللى يبيع ده مجنون


يقوم ييجى يوم زى امبارح

على شارت ال 4 ساعات السعر تقريبا وصل للحد العلوى للأزرق (يعنى اكتفى صعود، فاكرين التروس؟، عاوزين نصحى مع بعض)

وعلى شارت الساعة فى نفس الوقت كسر الأحمر لتحت وعمل اختبار، تقوم حضرتك عامل اييييه؟؟ باااايع

فى الوقت اللى كله بيقول شرا شرا شرا

تاخد منه حظك وتحمد ربنا (ماتنساش دى)

مع العلم انك لسه عارف انه على ال 4 ساعات مكمل صعود شوية، فماتفتريش فى النزول اوى عشان هايردهم تانى


ومن هنا تبقى قادر تتابع موضوع التروس المتداخلة قدر الامكان

من خلال معرفتك الاسبوع هايحصل فيه ايه، وللدقة من خلال الساعة على اليوم هايحصل فيه ايه

والأداة دى ولا هاتغلط وانت بترسمها، ولا بتعيد رسم نفسها مع السعر )عشان هى بتترسم على سعر قديم مش متغيرة مع الجديد) ، وبترسملك طريقك لقدام


وممكن كمان تعيد نفس اللى عملناه على الشارت اليومى بنفس الشكل

وده عشان تقدر تحدد الشهر ده هايكون نظامه ايه عامة، قبل ماتدخل فى التروس الأصغر

طبعا اكبر من كده يبقى افترا بقى، مش معقول عاوز تعمله على شارت الاسبوعى عشان تعرف السنة اللى جاية هايحصل ايه ههههههه

ده كان اقصى آمال الناس انها تعرف الشمعة بتاعت الساعة اللى جاية طالعة ولا نازلة وعملوا 100 مؤشر و 100 موضوع لده

فلما يكون اقل حاجة عندك انك تعرف يوم بحاله هايحصل ايه (قدر الامكان طبعا عشان ده غيب، انما محاولات) فحلو اوى اوى اوى وتحمد ربنا على نعمته
alskndry
24-02-2012, 11:43 AM
ملحوظات هامة

أولا
الشغل على فريم الساعة فقط
امال ال 4 ساعات ده ايه؟
ده مجرد يفهمك الاتجاه العام وللتأكيد على الاستمرار فى الصفقة (على الساعة) أو الخروج منها (على الساعة برضة)
وبيورينا التخيل العام للاسبوع (ممكن) يبقى شكله ايه (مش بالضرورة)
انما اللى بيحدد الشكل الفعلى هو فريم الساعة وتغير سلوك السعر خلاله

امال اليومى بقى؟
ده عشان نتخيل برضه شكل الشهر (احتما يبقى ازاى)
وتأكيده يكون من ال 4 ساعات
وتأكيد ال 4 ساعات من خلال الساعة

يعنى هاديلكم مثل
احنا هانبتدى شهر جديد
عملنا نظامنا على فريم اليومى عشان نتخيل الشهر
فلقينا (حاجة من الاتنين بس اللى اتشرحوا ماعندناش غيرهم الوقتى) ان الأحمر والأزرق متطابقين على بعض ونازلين لتحت
فى الحالة دى يبقى عندنا سيناريو من اتنين خلال الشهر ده

يا اما هايمشى فى ترند هابط يلمس القناة من فوق وينزل يلمسها من تحت
او هايكسرها من فوق ويطلع بهبل

طيب نعرف ازى؟
ندخل على ال 4 ساعات ونعمل نظامنا عادى
نلاقى الشكل فى الغالب هايكون شبه اليومى (عشان بقاله فترة نازل)
فيكون السيناريو هو هو احدى الحلّين

نقوم ندخل على الساعة ونعمل نفس النظام
ودى تكون محطة المراقبة بتاعتنا
ممكن نلاقى الساعة نفس الشكل (الأحمر والأزرق متطابقين برضة) فيكون نفس السيناريو
او يكون السعر مشى بالعرض شوية (بحيث تأثيره ظهر على الساعة ولكن لسه على ال 4 ساعات مش مؤثر اوى)
فيكون الشكل على الساعة ان الأزرق ماشى بالعرض شوية والأحمر باصص لتحت

الطبيعى عندنا اننا بنشتغل على الساعة مع وضع الحال العام فى الاعتبار
فلما يكسر الأحمر على الساعة لفوق يبقى هاندخل شرا (ده العادى) ولكن الاتجاه العام على اليومى وعلى ال 4 ساعات هبوط فيكون الدخول اما بلوت صغير عشان تقدر تعزز او بتارجت صغير (مش لازم يلمس الحد العلوى للأزرق)

ملحوظة هااااامة
ماتخافش ان الترند يعكس اتجاهه من بيع الى شرا وانت كنت شارى وقفلت بدرى
لا
هايرجع وينزل لك تانى لمنطقة الشراء الأصلية أو أفضل منها كمان قبل ما يبتدى رحلة الصعود
يعنى هاتركب الموجة هاتركب الموجة باذن الله تعالى
فبلاش تستعجل او تطمع وما تقفلش الصفقة عشان هايعكس الترند ويطلع
مافيش ترند بيتعكس خبط لزق، لازم فترة انتقالية الأول
والاستراتيجية بتاعتنا دى بتبين كل الفترات، الترند والانتقالى
بس انت
أدخل صحححححح

المهم
زى ما قلنا اشترينا على الساعة مع كسر الأحمر (على استحياء)
وبعدين تانى يوم مثلا هايتغير الشكل بتاعنا (عشان امبارح طلع السعر شوية)
فهايكون الأزرق ماشى بالعرض وتقريبا الأحمر ماشى باعرض برضة بس باصص لفوق

نركز هنا بقى
فيه 2 سيناريو

السيناريو الاول
لو الترند العام هايكمل هبوطه

هايبقى السعر على ال 4 ساعات مثلا لامس الحد العلوى للقناة
وعلى الساعة حبيبتنا
هايكسر الأحمر لتحت، فهاندخل بيع وبقوة (لوت عالى) ليه؟
اليومى هابط وماتكسرش
ال 4 ساعات لمس الحد العلوى وارتد وترند هابط
الساعة كسر الأحمر لتحت
عاوز ايه تانى؟

السينايو التانى
يكون الترند هايبتدى ينعكس
فالسعر على الساعة هايكسر الأحمر لفوق (لتانى يوم)
فهاندخل شرا (لسه على استحياء بس مش استحياء اوى زى امبارح ههههه)
هايطلع بينا شوية (يمكن يكون بقوة)
فى الحتة دى هايكون كسر الحدين العلويين للقناتين المتطابقتين على ال 4 ساعات
يبقى ساعتها يا فرج الله الاسبوع ده هايكون طلوع بغباوة وفيه ناس كتير هاتصفّر حساباتها (المتمسكين بالبيع) نحاول احنا نكسب بقى

ساعتها السعر هايعمل زى ما قلنا من شوية
هاينزل تانى ويمكن لسعر أفضل من اللى اشترينا على أول ما كسر
وده عشان يعمل اختبار على ال 4 ساعات قبل ما ينطلق
ويمكن على الساعة نلاقيه دخل تانى جوة الأحمر اللى لسه كاسره
(من هنا ييجى دور ال 4 ساعات فى تحديد الاتجاه وليس فى المتجرة)

طبعا احنا مش هانشترى من تحت اوى (بلاش افترا ههههه) وبلاش تخييييل (تاجر ما ترى وليس ما تظن)
الشرا وبمنتهى القوة يكون لما السعر يرجع ويطلع تانى من الأحمر على الساعة
ويكون تم التأكيد على اختبار فى ال 4 ساعات (والحاجتين دول متزامنين يعنى بيحصلوا سوا)

يعنى لما يرجع يكسر على الساعة بيكون فى الغالب عمل شمعة هامر او بولش انجلف على ال 4 ساعات مع لمس القناة المكسورة والارتداد منها

يبقى اشترى ولا حرج
والا سبوع ده هايطيييييير لفوق

هايكون عندنا الشكل كالتالى
على ال 4 ساعات القناتين باصين لتحت ومتطابقتين والسعر خرج منهما وطار (الفريم ده كده مالناش دعوة بيه تانى لآخر الاسبوع عشان الشكل ده مش هايتغير)
اما على الساعة فأول يوم لما السعر كسرهم وطار هايبقى الشكل شبه ال 4 ساعات
اما تانى يوم فهايكون الأحمر باصص لفوق ورفيع ومخترق الأزرق من شدة طلوع السعر (أكيد يعنى) والأزرق عريض وبيبتدى يبص لفوق
فلو السعر هايكمل بنفس القوة (وده فى الغالب)
ممكن يلمس الأحمر من تحت ويطلع بقوة
وممكن يكسر الأحمر لتحت (ده شكل جديد غير اللى فاتوا) خلى بالك
هايكسر الأحمر لتحت (ادينى باعيدها تانى) ويلمس طرف الأزرق من فوق ويطييييير يطير زى العصافيييير

طيب ليه لما هايكسر لتحت مش هانبيييييع؟؟

احنا قايلين انه على ال 4 ساعات اخد فى وشه ومسافر لدرجة اننا مش هانبص عليه تانى باقى الاسبوع
يعنى كل نزول شرا
وعلى فكرة
غير موضوع ال 4 ساعات انه طالع
الشكل نفسه بتاع الساعة ما بيبقاش هو هو
يعنى الأحمر بيكون رفيع عن العادى وخارج عن الأزرق اوى (لقوة الشموع الصاعدة المرسوم عليها)

عموما
الشرح النظرى شىء
ولما تجرب عملى وبإيدك والخبرة شىء تانى خالص، وده اللى احنا عاوزين نوصل له

وعلى فكرة
ممكن قدام شوية بعد ماتكتسبوا الخبرة
من أول ما ترسموا النظام بتاعنا من بالليل ومن شكل الأحمر مع الأزرق
تقول انا بكرة أجازة وتستمتع بحياتك
ولما ترجع بالليل تلاقى اللى انت كنت عارفه
انه مشى بالعرض فى رينج ضيق (نبقى بعدنا عن التذبذب)
او انه غير محدد الملامح (على الساعة طالع وعلى ال 4 نازل واليومى بالعرض) فلما تيجى بالليل تلاقى ناس فى المنتدى بتعيط انه ليه عمل كده او ان فيه مؤامرة ضد أموال العرب
فتحمد ربنا (تانى ماتنسهاش دى)

معلش ان الشرح من غير صور
بس محتاج شوية تخيّل
فيارب تكون الصورة الكاملة وضحت
alskndry
24-02-2012, 11:53 AM
شرح السلوك السعرى باستفاضة
وكيفية ربط الشارتات ببعضها

النقطة دى من اهم النقاط ولكن من الصعوبة الوصول اليها عشان محتاجة معايشة للسعر وخبرة فى الشارت والسلوك السعرى
فاللى مش هايقدر يعمل ده مش مهم بس يحاول معاه ومايهملوش لحد لما يتمكن منه

عشان توصل للموضوع ده لازم تكون ملمّ بكل اللى اتقال قبل كده
الشارت الاكبر هو الاتجاه العام للشارت الاصغر
والشارت الاصغر هو كيفية الوصول لهذا الاتجاه العام
يعنى الاصغر مرسوم له خط سيره من الشارت الاكبر
والاكبر بيترسم فعليا من خلال الشارت الاصغر

مش فاهم، يعنى الفرخة من البيضة ولا البيضة من الفرخة
(اكيد الاتنين من بعض)

ازاى الكلام الغريب ده

مثلا انا فاتح صفقة شراء على الباوند
ليه ممكن نقفل الشراء قبل ما يوصل للهدف ؟
هاتلاقى ان شارت اليومى السعر قرب من الحد العلوى للأحمر (وده كده يعتبر مقاومة شهرية)
على شارت الساعة ابتدى السعر يُظهر انه مش قادر يطلع تانى (السعر على فكرة صاحبنا، وعمره ما بيخون حد، انما احنا اللى مش بنعرف لغته ولا بنسمع تنبيهاته)
السعر كان ماشى بقوة لحد ساعة معينة
ولكن من الساعة اللى بعدها ابتدى يبقى ضعيف
وقفلت الساعة على شكل اسمه اسبينينج توب، وده مش عاكس للاتجاه ولكن بيدل على الضعف
خلى بالك وماتنساش احنا قلنا السعر موجود فين على اليومى (عاوزين نربط كل الشارتات ببعضها)
لما تيجى الساعة الثالثة اللى بعدهم وتعمل شكل (فى رأيى من أفضل الاشكال العاكسة وانا عن نفسى باستخدمه كتير وقلنا عليه بسرعة سابقا) وهو اسمه فولنج اوف ذى رووف (أو السقوط من السطح) وهو ده اللى حصل بالفعل بعدها
يبقى مستنى ايه عشان تبيع؟

شرح مبسط لهذا الشكل القوى
فولنج اوف ذى رووف
هو عبارة عن شمعة تكون الهاى بتاعها اكبر من هاى الشمعة اللى قبلها ولكن تعكس وتقفل على كلوز اقل من كلوز اللى قبلها
ودى غير شوتنج ستار اللى مش لازم تكون الهاى اعلى من اللى قبلها ولا الكلوز اقل

وكلما بقى الهاى اعلى (يعنى تعمل ذيل طويل من فوق) وكلما كان الكلوز اقل (يعنى تبقى حمراء طويلة) تكون الوقعة اللى بعدها اكبر ههههه

المهم
نرجع نربط الشارتات تانى
لما السعر على الساعة عمل شكل الشمعة اللى شرحناه، بعد ما عمل اسبينينج توب مع وجود السعر على مقاومة شهرية
يبقى بيع
وفعلا السعر نزل
خلال ما السعر بينزل هنا شمعة ال 4 ساعات لسه بتتكون (اللى بيكونها هو شموع الساعة، التى بالتالى تتكون من خلال شموع الربع ساعة وهكذا)
فلما شمعة ال 4 ساعات اكتملت وقفلت نبص نلاقيها عاملة اييييييه؟؟؟
برافو عليكم
عاملة فولنج اوف ذى رووف برضة بس على ال 4 ساعات
يبقى ده استمرارية فى النزول

ومن هنا ييجى الربط بين الفريمات
الفريم الكبير بيحدد ملامح الفريم الاصغر
بينما الفريم الاصغر هو اللى بيرسم فعليا هذه الملامح

وبس

وبكدة يكون الشرح والاستراتيجية خلصت

ومعلش لو طولت عليكم شوية

او لو فى بعض الكلام مشروح من غير صور

بس والله انا عملت اللى اقدر عليه وارفقت بعض الصور اللى ما كنتش موجودة

تحياتى لكم ولادارة المنتدى اللى له فضل علينا بعد المولى عز وجل

واى سؤال انا فى الخدمة اخوكم السكندرى
alskndry
24-02-2012, 12:09 PM
اليكم مثال حى على هذه الاستراتيجية

اليورو دولار

الجميع كان متوقع هبوط كبير لليورو دولار وانا اولهم

وكلنا منتظرين الهبوط المدوى وقلنا المستوى 1.3300 مقاومة قوية جدا

ولو نظرنا على شارت اليورو دولار حسب هذه الستراتيجية لوجدنا عكس ذلك

لاحظ معايا

شارت اليورو دولار اليومى وده بيعطينا حركة الزوج على مدى شهر

http://im18.gulfup.com/2012-02-24/1330074003741.jpg


السعر ماشى فى قناة سعرية صاعدة اذن هو هو صاعد على المستوى الشهرى

كمان كسر القناة اللى بالعرض لفوق واعاد الاختبار وصعد زى الصاروخ


طيب شارت الاربع ساعات

http://im30.gulfup.com/2012-02-24/1330074147291.jpg

زى ما حضراتكم شايفين السعر كسر القناة لفوق

وكمان كسر القناة الاخرى لفوق وطالع زى الصاروخ

اذن فريم اليومى والاربع ساعات صاعد

كل ده وما ندخلش بس احنا عرفنا الاتجاه صاعد

نيجى بقى لشارت الساعة

http://im23.gulfup.com/2012-02-24/1330074279861.jpg

السعر ماشى فى قناة صاعدة وعمال يخبط فى ضلعيها فوق وتحت يعنى ممنوع البيع

طيب لو نظرنا على فريم الساعة امبارح

http://im16.gulfup.com/2012-02-24/1330074408261.jpg

حصل ايه امبار ح السعر كسر لفوق

يبقى الفريمات الثلاثة متطابقة شراء يبقى شراء قوى وصفقة 100%

وده اللى حصل السعر كسر عمل اعادة اختبار زى اى ترند وانطلق كالصاروخ

وكان الجميع بيقول بيع بيع بيع بيع وطبعا انا اولكم

بس الحمد الله لازم نتعلم من اخطاءنا
alskndry
25-02-2012, 09:17 PM
هذا الشارت يبين طريقة الرسم

http://im26.gulfup.com/2012-02-25/1330193805941.jpg
د/جابر
25-02-2012, 11:28 PM
لو تسمحلى

اضيف حاجة بسيطة وانا بصراحة كونت هعمل الموضوع دة بس بصراحة حضرتك كافيت ووفيت احيك اخى

هية الرسم القناه

اولا الرسم على اليوم السابق علشان نشتغل على اليوم الجديد
ثانيا ودة التعديل ان القناه بدل لما ترسم على يومين ترسم على ثلاثة ايام بما فيهم يوم الى قبل الجديد او القناه الاولى

واليك صوره توضح اكثر لماذا ثلاثة ايام وهية عملة اليورو دولار ونفس الفريم الذى ارفقتها

http://img838.imageshack.us/img838/8730/85134553.png

وكمان 4 ساعات للتوضيح

http://img38.imageshack.us/img38/3043/92686940.png


ثلاثة ايام بما فيهم اليوم قبل العمل يعطيك اكثر اماكن مسالية فى الدخول وتكون اكثر نجاح

ابو صلاح اعملى لايك بقا انتا مبيتلعش منك لايك بساهل

يريت يا استاذ السكندرنى نعمل ورشة انا وانتا وتكون خير للجميع الاعضاء

ما رئيك

وعلى فكره انا بردوا اسكندرانى
Learn4X
26-02-2012, 04:01 AM
مرفق مؤشرات الاستراتيجية
حيث لن تحتاج لرسم القنوات كل يوم جديد
ملف mgy base.tpl نضعه في مجلد برنامج الميتا تريدر المسمى templates
والباقي نضعه \experts\indicators
alskndry
27-02-2012, 05:38 PM
هنا وضع اليورو دولار اليوم ووضعه الان

على شارت الساعة كان الدخول بيع على صفقتين

الصفقة الاولى مع كسر القناة وهدغها حد القناة الاخرى كما هو موضح بالصورة

http://im16.gulfup.com/2012-02-27/1330353320161.jpg


ومايؤكد البيع شارت الاربع ساعات هابط

ودلوقتى ازاى نعرف هدف البيع الصفقة الثانية

ننظر لشارت الاربع ساعات نجد ان انه اقترب من حد القناة وهنا هدف الصفقة عن 1.3370

اليكم الصورة للتوضيح

http://im27.gulfup.com/2012-02-27/1330353427191.jpg
alskndry
27-02-2012, 06:29 PM
الباوند دولار

شارت الساعة

كسر اول قناة حقق الهدف عند حد القناة

الصفقة الثانية ننتظرالبيع مع اعادة الاختبار

اليكم الشارت للتوضيح

http://im25.gulfup.com/2012-02-27/1330356264271.jpg


شارت الاربع ساعات هابط باذن الله

ولكن حذارى هناك مقاومة عند خط الترند الصاعد عند المستوى 1.5830

http://im25.gulfup.com/2012-02-27/1330356269752.jpg


شارت اليومى لم يستطع الزوج كسر خط المنتصف للقناة وارتد منها اذن هو هابط باذن الله

وهو ما اكد لنا دخول صفقة البيع الاولى وفعلا حققت الهدف

وصفقة البيع الثانية ننتظر اعادة الاختبار وندخل بيع باذن الله

http://im25.gulfup.com/2012-02-27/1330356269323.jpg
lamtrader
28-02-2012, 10:35 AM
http://www.fx-arabia.com/vb/uploaded/3524_11330413981.png (http://www.fx-arabia.com/vb)
lamtrader
28-02-2012, 10:37 AM
http://www.fx-arabia.com/vb/uploaded/3524_01330413981.png (http://www.fx-arabia.com/vb)
lamtrader
28-02-2012, 10:38 AM
http://www.fx-arabia.com/vb/uploaded/3524_21330413981.png (http://www.fx-arabia.com/vb)
د/جابر
01-03-2012, 03:48 PM
بسم الله الرحمن الرحيم

صباح الخير على الجميع


اليورو الان فى منطقة حساسة جدا على شارت الاربع سعات
كسر القناه الصاعدة ويتداول فى قناه شبة مائلة او عرضية

http://img254.imageshack.us/img254/3424/45256395.png

يمثل الترند الاوسط نقطة مفصلية فارجوه الخذر

شارات الساعة توضح اهمية النقطة هذه فى سلوكك السعر على شارات الساعة
واليورو الان يتداول على حافت القناه الهابطة

فنا ارى الدخول الصحيح فى القناه الهابط على شارات الساعة والاغلاق داخلاها او اغلاق شمعة اربع سعات داخل القناه الهابطة

http://img443.imageshack.us/img443/4786/45066504.png
hema1980
11-06-2012, 10:53 PM
احلي فيديو للاستاذ جمال ممدوح
علي هذا الرابط
لا تنسوني من صالح دعائكم
http://www.youtube.com/watch?v=Mn6DkwvEaBY