بسم الله توكلنا على الله ..
نكمل موضوعنا من جديد .. ونرد على باقي الأسئلة ..
وهنرد النهاردة على الأسئلة 4،5،6،7،9
4. هل هناك رابحون في هذا السوق؟!!
5. نسبة الرابحين أكثر أم الخاسرون ؟!!
6. هل هناك طرق لضمان المكسب في هذا السوق ؟!!
7. ماذا عن الكسب السريع والوصول للمليون المزعومة ؟!!
9. هل الفوركس وهم خطير أم حلم كبير ؟!!
الإجابات :
4. نعم .. هناك رابحون في هذا السوق وهم ليسوا بقليل ولكنهم ليسوا بكثير أيضاً .. يعني إيه؟!! يعني من الآخر في ناس بتكسب .. واحنا جايين هنا علشان نعرف الناس دي بتكسب إزاي وليه .. وإزاي وصلوا إنهم يكسبوا ..!
5. نسبة الرابحين أقل بكثير من نسبة الخاسرين .. يعني النسبة الأكبر خاسرة .. ( يا مامي .. خفت أنا كده ) لا يا عم استنى .. ليه تبص للخاسرين ؟!! ليه منبصش للناس اللي بتكسب ونقلدهم؟!! ليه منعرفش بيكسبوا إزاي وأسرار مكاسبهم .. ليه منتعلمش صح ونتبع كلام خبراء هذا السوق .. يبقى نتفق اتفاق .. الخاسرين كتير أوي في السوق ده .. لكن احنا هنتعلم وهنتبع طريق الناس اللي بتكسب وهنكسب ..!!
6. أها .. جينا بقى لألأسئلة المفيدة .. وكده بدأنا نحط رجلينا على أول خطوة .. وأطمنكم وأقولكم .. أيوة .. في طرق لضمان المكسب إن شاء الله .. وهفصلكم نقاط بسيطة نحاول نمشي عليها مع بعض :
* حاول تتعلم وتتدرب وتتعب لمدة متقلش عن 6 شهور على حساب تجريبي .. تكون في خلال المدة دي بتحاول تحط إيدك على طريقة المتاجرة السليمة ( بالنسبالك ) يعني الطريقة المناسبة ليك ولراس مالك ولظروفك .. من الآخر طريقة يكون بينك وبينها عشة وتكون بتحبك وبتكسبك ..!
* إبدأ من حيث انتهى الآخرون .. يعني اسمع كلام الخبراء في السوق .. الناس الخبرة الكبارات بتوعنا .. دول هتسمع منهم درر .. واوعى تكابر وتمشي عكس التيار لأن التيار هيدهسك .. تابع كل الورش بتاعت الناس الخبرة اتعلم قبل ما تطبق .. متطبقش قبل ما تتعلم .. ( الورش مهمة جدااااااً ) !!
* ممنوع منعاً باتاً المضاربة والتداول في وقت نفسيتك مش مرتاحة ( بتنام - مش فايق - زعلان - غضبان - متنرفز - منتشي - فحان فرح جامد ) من الآخر وقت ما تكون بارد وأعصابك هادية اشتغل .. وركز كويس .. !!
* إياك والطمع وإياك والخوف .. بس !!
طبعاً مش دول هما طرق ضمان المكسب لا .. دول مفاتيح علشان تبدأ بنفسك تعرف طريقة مكسبك إنت ..لأن كل واحد فينا طريقة مكسبه تختلف عن التاني ( وده من تجربتي الشخصية ) ..!
7. المليون المزعومة .. أو الوصول من 500 دولار لـ مليون في شهر أو 3 أو حتى سنة ..!
هل ده ممكن ؟! أيوة ممكن .. لكن ممكن تقول كده 1 في المليون .. والباقي بيخرج مصفر حسابه ..
مش لسة قايلك إياك والطمع .. إدارة راس مال سليمة وحازمة وملتزمة .. تكفيك وتغنيك .. تكفيك من المكسب وتغنيك من الخسارة !
9. أعتقد السؤال التاسع إنتوا دلوقت تقدروا تجاوبوا عليه بنفسكوا .. كل واحد على حسب فهمه !!
-----------------------------------------
هنا انتهى الجزء ده من الموضوع .. منتظر تعليقاتكم علشان أكمل باقي الموضوع ..
بالتوفيق..،