• الروافع المالية والهامش :
قبل ما ندخل في الموضوع ده وعلى فكرة ده موضوع مهم جدا بس سهل جدا ... هندردش الاول مع بعض ..
ايه رأيك في اليورو / دولار دلوقتي سعره = 1.3000 ايه رأيك انت قولت انا هشتري وهبيع لما السعر يرتفع شوية .. طيب انت اشتريت 100 يورو والسعر ارتفع فعلا وبقى 1.3001 يعني ارتفع نقطة واحدة طيب تعالى نشوف انت لو بيعت دلوقتي هتكسب كام .. انت هتكسب في اليورو الواحد 0.0001 طيب وانت معاك 100 يبقى مكسب 0.01 دولار ينهار ابيض دول بس ؟؟؟!!! ده مش مكملين 10 سنت ( السنت بالنسبة للدولار زي القرش بالنسبة للجنيه المصري ) ... طيب والحل ؟؟؟
الحل أنك تشتري كميات ياريس ... طيب يعني كام مثلا ؟؟ يعني مثلا يا غالي تشتري 100000 يورو .... يعني ياعم مصطفى انا لو معايا 100000 يورو كنت اتكلمت معاك اصلا ... على فكرة يا عمونا دي تعتبر مش فلوس بالنسبة للسوق ده طيب ايه رأيك هقولك معلومة كده على السريع انت عارف حجم التداول في سوق الفوركس = 4 تيرليون دولار يوميا ..!!!
طيب والعمل ياعم مصطفى ؟؟ العمل يا سيدي الفاضل هو الروافع المالية ..!!
يعني ايه الروافع المالية .؟؟
انا هقولك الروافع المالية دي هي حل اللغز بالنسبة ليك ... طيب برضه يعني ايه ؟؟؟
ركز معايا يا غالي وانا هقولك ... الروافع المالية ببساطة مثلا لو انت معاك 1000 دولار وعاوز تشتري مثلا 100000 يورو أو اي عملة تاني هتقدر تشتري ... طيب ازاي ؟؟ الحكاية وما فيها الشركة مثلا هتقدملك قوة شرائية اضعاف رأس مالك يعني مثلا الشركة هتقولك انا هديلك رافعة مالية 400:1 يعني ايه ؟؟ يعني الشركة هتديلك 400 ضعف لرأس مالك يعني مثلا لو انت عاوز تشتري 100000 يورو ... هتقسم 100000 ÷ 400 = 250 دولار بس ... يعني هتدفع 250 دولار للشركة وهيفضل معاك 750 دولار طيب كويس ياعم مصطفى انا أخد 100000 يورو دول واخلع واضحك على الشركة .. هقولك ماشي يا ابو دم خفيف مكنش حد غلب كنت انا اول واحد اخدت فلوس وخلعت .. طبعا الفلوس دي مش هتاخدها في أيدك لا الشركة هتشتريلك بيهم ولما تكسب ان شاء الله الشركة هترجعلك الـ 250 دولار بتوعك اللي هما زي تأمين كده وده بنسميه هامش مستخدم .. وهتاخد فلوسها وانت حلال عليك المكسب كامل .. طيب لو خسرت يا مصطفى ؟؟؟ زي ما انت هتاخد المكسب كامل برضه هتتحمل الخسارة كاملة .. بس الخسارة دي هتكون كام مثلا ... طيب ايه رأيك نتكلم بالارقام في مثال بسيط ..
هنفترض ان سعر اليورو مقابل الدولار دلوقتي = 1.3000 وانت معاك في الحساب بتاعك في الشركة 1000 دولار
وخلاص قررت انك هتشتري 10000 يورو علشان انت بتتوقع ان اليورو سعره هيرتفع .. طيب ايه اللي هيحصل كل اللي هيحصل ان الشركة هتسحب منك 10000÷400 = 25دولار ( على فكرة هما مش 25 بالظبط ممكن يكون فيه كسور لان اليورو اغلى من الدولار ودي حاجة متشغلش نفسك بيها البرنامج هيحسب كل حاجة من غير ما توجع دماغك ) اللي هما هامش مستخدم ( زي تأمين ) هيفضل كام معاك في الحساب ؟؟
1000 – 25 = 975 وده المبلغ الباقي في الحساب بتاعك وده هنسميه الهامش المتاح ..
طيب تعالى نفترض افتراضين الاول في حالة المكسب والتاني في حالة الخسارة ( لاقدر الله )
الاول المكسب : طيب افترضنا ان السعر اتغير ووصل 1.3050 يعني السعر اتغير 50 نقطة طيب مكسب هيكون كام ..
0.0050 × 10000 = 50 دولار تمام وانت خلاص قررت انك تنهي الصفقة يعني تبيع اليوروهات اللي انت اشتريتها .. خلاص يبقى الشركة هتاخد 10000 يورو وهترجعلك 25 التأمين ( اللي هما كانوا هامش مستخدم ) وكمان هترجعلك مكسبك كامل اللي هو 50 دولار ..
طيب الافتراض التاني : الخسارة ..
هنفترض ان السعر نزل ( هبط ) ووصل 1.2950 يعني هبط 50 نقطة .. يبقى انت خسران كام ؟؟ ايوه صح كده 50 دولار طيب لو انت قررت انك تقفل الصفقة او تنهيها ... ايه اللي هيحصل ..؟؟ كل اللي هيحصل ان الشركة هتاخد 10000 يورو اللي هما بتوعها وهترجعلك الـ 25 دولار ( هامش مستخدم ) وهتخصم من الهامش المتاح ( 975) الخسارة اللي هي 50 دولار طيب افرض الخسارة زادت ... بص يا سيدي الخسارة ممكن تزيد عادي جدا بس طبعا الشركة مش هتقبل انها تدفعلك من جيبها علشان كده الشركة هتقولك اخسر براحتك بس لو وصلت الخسارة لغاية الهامش المتاح ( اللي هما 975 ) يبقى انا هقفل الصفقة غصب عنك علشان اضمن اخد 10000 يورو كاملين ... ازاي يعني كاملين ..؟؟ انا هقولك انت لو خسرت اكتر من 975 دولار يبقى مفيش حل قدام الشركة غير انها تخصم الخسارة دي من 10000 يورو .. طيب يبقى كده هي مش هتاخد المبلغ كامل ودي فلوس يتامة طيب سامعك بتقول طيب ما هو فيه 25 دولار وخداهم ضمان ( هامش مستخدم ) طيب يا سيدي في بعض الشركات ممكن تكمل عليهم يعني تستني الخسارة لما توصل 1000 دولار وفي شركات مش بتقرب عليهم يعني تستنى الخسارة لغاية لما توصل 975 وتقفل الصفقة وتاخد 10000 يورو وترجعلك في الحساب 25 دولار ... ولما يحصل كده ( الخسارة توصل للهامش المتاح ) يبقى هنا حصل حاجة اسمها نداء الهامش ....
طيب يبقى كده احنا قولنا كام حاجة تتعلق بالهامش ...؟؟
ايوه بالظبط كده 3 حاجات وهما :
الهامش المستخدم : وده عبارة عن مبلغ التأمين اللي بتخصمه الشركة من حسابك في سبيل انها تزود قدرتك الشرائية .
الهامش المتاح : وده عبارة عن المبلغ الباقي في الحساب بعد خصم الشركة الهامش المستخدم .
نداء الهامش : وده بقى بيجيلك لما الخسارة تزيد وتوصل لغاية الهامش المتاح وساعتها الشركة بتقفل الصفقات المفتوحة غصب عنك .
كده خلصنا كل حاجة متعلقة بالروافع المالية والهامش ..
هنشوف آخر حاجة معانا بس في المشاركة القادمة