أنا فاتح في بنـك NSGB وبنـك CIB وكل بنك ليه مميزات وعيوب بس بنقول البنك سئ لما تكون العيوب اكتر من المميزات وتكون كمان عيوب مؤثرة ،، NSGB سئ جدا
أولاً NSGB :
1- خدمـة عملاء عاليـة بس في النهاية النتيجة سيئـة بمعني انهم يستقبلوك حلو اوي اوي بس أهي دقني لو عرفت تطلعهم غلطانييـن ولا تطلع اصلا بنتيجة من الموضوع اللي انت رايح علشانـه
2- خدمة الإنترنت البنكي في قمــة السـوء
3- في رسوم التحويل والإستقبال لم أستخدمه للنظر للحالتين السابقتين لأني كنت فاتح فيه قبل ما اتعمق في الفوركس وافتح حساب حقيقي وبسبب النقطتين اللي فوق فتحت حساب في CIB
ثانياً : بنك CIB
1- خدمة عملاء جيدة والنتيجة فعـالة يعني لو في مشكلة رايح علشانها غالباً بتتحل
2- خدمة الإنترنت البنكي جميلة جدا جدا ما شاء الله وممكن تستعملها في أي حاجة يعني لو ركزت فيها مش هتحتاج البنك تروحـه لأي حاجة الا لو فيه مشكلة ما
3- فيه امكانية فتح حسابات بالدولار للشباب حتي سـن 26 سنـة واقل مصاريف لفتح حساب الشباب 200 دولار فقط ومش بياخدوا أي مصاريف شهرية او مصاريف لما حسابك بيعدي عليه شهر وهو مش فيه الحد الأدني للحساب
4- نيجي لنقطة الحوالات البنكية ،، في الإرسال سرعـة فائقة علي الرغم من انهم بيرسلوها عن طريق بنك وسيط تقريباً يعني انا اتعاملت مع اكتر من شركة في الفوركس ولما كنت بحول من البنك كانت بتوصل تاني يوم بليل وفي مرتين وصلت في نفس اليوم بليل بس مصاريف الإرسال غالبا عالية ( 55 دولار تقريبا في اخر حوالة ارسلتها ) الله اعلم لم استعمل بنوك تانية
في استقبال الحوالات بقا بتاخد وقت يعني حوالي 4 او 5 ايام وبيتخصم 50 دولار بالظبط
5- لما بتعمل إيداع في حسـابك بالدولار بتستني يومين لحد ما الفلوس تظهر في الحساب واعتقد ده حاجة سيئة بس معرفش موجودة في بنوك تانية ولا لأ
عموما اتمني اكون أفدت أي حد عايز يفتح حساب واظنني اتكلمت عن البنك عموما والنقاط اللي تهمنا فيه أكيد في مميزات وعيوب تانية بس دول المهميـن جدا بالنسبة للتعامل البنكي ،، لأن لما هفتح حساب في بنك أكيد مش هيكون علشان الفوركس وبس أكيد هيكون لكل استخداماتي الماليـة فلازم نبص للمميزات والعيوب اللي هتكون موجودة في اللي محتاجينـه....
آسف علي الإطالـة وتمنياتي للجميع بالتوفيق