اليوت، جان، ستيف وغيرهم الكثير ممن اشتهروا فى هذا المجال، هم عبارة عن ايه؟؟
هم مش منزلين من السما، دول ناس عادى جدا زيى وزيك، اكيد لما ابتدوا مجال الفوركس ماكانوش عارفين حاجة وشوية شوية تطوروا، وكان عندهم أفكار كانت غريبة شوية فى زمانهم لحد لما اثبتت جدارة فانتشرت وبقت أسماء معروفة ولهم تلاميذ وبقت طرقهم تدرّس
ليه الناس حاسة ان مافيش تانى خلاص هم دول وبس؟ ماتحاول وتجرب يمكن تكون واحد منهم، ويمكن تكون أفضل منهم، العرب هم أساس كل العلوم
الفكرة كلها فى رأيى تتلخص فى قوة الملاحظة والمتابعة وحسن التفكير وجودة التحليل (ولا أقصد التحليل الفنى، ولكن التحليل عموما)
السعر هو الأساس ومن كتر متابعته تنتج الأساليب
زى أشكال الشموع
دول شوية يابانيين قعدوا قدام الشارت ولاحظوا حاجات من كتر متابعتهم
لقوا لما بتتكون شمعة (سموها بعد كده شوتنج استار) بينعكس السعر وبينزل
طيب بذمتك كام شوتنج استار بتحصل والسعر بيكمل صعود كتير كمان بعدها؟
وحتى استيف نيسون (ده الراجل اللى ترجم ونشر موضوع الشموع اليابانية وليه كتب كتير فى المجال ده) فى كورساته بيقول ان لما بنلاقى أى شكل من أشكال الشموع بيكون مجرد دليل أو يرجّح احتمالية انعكاس الترند مش لازم ينعكس بالفعل، وكمان لازم من تأكيده بحاجات تانية (اللى هى كانت الدعوم والمقاومات الأفقية) يعنى تاااااااانى هى دى الأساس
طيب
لما نلاحظ حاجات على الشارت ومن اسلوب تحرك السعر برضة، بس تخلينا نقدر ناخد الاتجاه من أوله قدر الإمكان مش ده كويس؟
لما نقدر نتوصّل (سوا) الى ان الأخبار ماتفرقش معانا ونتاجر فى أيام الأخبار عادى بل ونستفيد من قوة اتجاه الخبر مش ده جميل؟؟
أنا عاوز أسأل سؤال، لما بلاش نتاجر وقت الأخبار (وما أكثرها) ، وبلاش طبعا يومى الخميس والجمعة لما فيهم من احداث وقوة تحركات تعصف بالحسابات، وساعات بلاش يوم الاثنين عشان ده اول الاسبوع ولا يقل خطورة عن الخميس والجمعة، وبالتأكيد نستبعد أول وآخر كل شهر عشان تقفيل الشهر (اذا كنا مابندخلش فى نهاية الاسبوع هاندخل فى نهاية الشهر؟ دى حاجة بالعقل حتى)، ونستبعد آخر شهر فى السنة (تقفيل ميزانية دول بقى وخروج ناس كتير من السوق لتسييل فلوس قبل الأجازات وحاجات كتير تانية انا مش عارفها) ده طبعا غير الأجازات الرسمية خلال السنة
حلو جدا الشغلانة اللى بتشتغل يوم الاربعاء 21 مارس (ده لو انت فاضى وما بتحتفلش بعيد الأم) ويوم الثلاثاء 11 سبتمبر (ربنا يجعل كلامنا خفيف عليهم) وبسسسسس والباقى اجازات لصعوبة السوق 
بالذمة ده كلام؟؟ امال داخل الفوركس ليه
فلما نقدر نشتغل كل الايام (اللى فيها فرص طبعا) وفى اى وقت مش فترات معينة (عند اكتمال الفرصة) وباقى الأعضاء هاتنزلوا فرص هنا انا متأكد باذن الله
بس يارب ساعتها تفتكرونى مش تاخدوا الموضوع وتبقوا مليونيرات وماحدش يعبّرنى