بالنسبة لموضوع عدد اللفات او الزمن بتاعها هو غير محدد
والا ماكانش حد غلب فاذا كان الزمن مثلا لفة كل 3 ايام استنى يومين وآجى آخد لفة 
وكذلك بالنسبة للعدد
انما الفكرة فين؟
فى اكتمال الحركة
يعنى ايه الكلام ده!!!
يعنى المثل اللى ذكرناه سابقا عن ان الهدف اليومى مثلا 500 نقطة، فهنا اكتمال الحركة يدور حول ال 500 (مش لازم بالظبط) انما اكتمال اللفة على اليومى بالوصول لل 500، وبالتالى على ال 4 ساعات ممكن ينزل ويطلع بس الاتجاه الاساسى صعود فيبقى مقدار الهبوط أقل من المقدار الصعود حتى يصل الى ال 500 فيبدأ فى حالة من تغيير المسار سواء يمشى بالعرض شوية او يبتدى ترند هابط
وهنا فيه كذا نقطة
أولا
نعرف منين ان الحركة انتهت؟ بيبان على العملة انها انهكت من الصعود على جميع الفريمات، زى الرياضى لما بيجيب آخره من التعب، بيكون هو أرهق وأداؤه بيقل (خلى بالك انه لسه بيؤدى ولكن ليس بنفس الكفاءة) ولو بصينا على العضلات من الداخل (دى الفريمات الاقل) نجدها فى حالة ارهاق وعلى وشك التمزّق و غيره وغيره من العلامات
ده المثل اللى بيودينا الى نظام (الدايفرجنس) وهو التعب والارهاق الداخلى حتى مع الاستمرار فى العطاء ولكن يدل على وجود قصور سيُحدث تراجع بعد قليل
فنجد ان السعر يواصل صعوده مع وجود اشارة للدايفرجنس للهبوط وده دليل تعب العملة من الصعود وبداية اكتفائها
معلش انا عارف انى باجرى شوية والناس المبتدئة مش هاتعرف تلاحق ايه الدايفرجنس وباقى الحاجات بس الموضوع ده خارج الشرح
ثانيا
طيب احنا عرفنا منين من الأول ان على اليومى هايمشى 500 نقطة؟؟
ده بيبان من خلال الفريم الأكبر
وخلى بالك القصة مش بالمللى كده وخاصة فى التنبؤات البعيدة
يعنى ممكن نقول هايمشى على اليومى 500 نقطة، ولكن السوق عمل حاجات خلال الفترة الحالية تؤدى الى ان كده اكتفى بالصعود بعد 400 نقطة مثلا واعطى اشارات بالهبوط، فلابد نكون طيّعين مع السوق مش جامدين، وتاخدنا الكرامة لا انا قلت انه هايتحرك 500 يبقى لسه فاضل له 100، الكلام ده فى سوق الخميس 
انما السوق ده ممكن يفرم أى حد يعاند معاه
وده يخلينا نأكد على المتابعة مع تغيرات السوق
يعنى مش نحط التارجت واستوب ونسيبه ونمشى (ده اذا كنا مسيطرين على الناحية النفسية)
ولكن نتابع
انا فى مرة السوق وصل حتى قبل التارجت بنقطة واحدة، وحلف 100 يمين ماهو جايبها، لحد لما قفلتها يدوى على اقل من التارجت المحدد ب 5 نقاط لما اعطى اشارات تغير الاتجاه، ولو كنت مش متابع كان ضرب الاستوب بعد الوصول الى 99% من الهدف بتاعى (بالذمة ده عقل؟؟)
ومن هنا تظهر نظريات انا شخصيا لا احبذها (ولكنها تنفع مع الغير متابع) فمثلا اللى يقول حط الهدف بتاعك أقل من الهدف الأصلى ب 10 نقاط (ده على اساس اللى حصل معايا كده فيلعب على المضمون) طيب ماهو ممكن يعمل نفس الموضوع وييجى قبل ال 10 نقاط بنقطة، وبعدين اذا كان الهدف انت حاسبه صح ليه تخسر فى كل صفقة 10 نقاط؟؟
او اللى يعمل تريلنج استوب، فبعد ما تكون الصفقة لصالحه 50 نقطة مثلا فتقفل على الدخول ويخرج ب صفر، والأدهى انها ترجع تكمل للهدف بعد ما تخرجه، وكل ده وهو مش متابع